அநீதிக்கும் அக்கிரமங்களுக்கும் எதிரான மக்களின் குரல் – வார உரைகல்..

‘பெண்கள் வளையல்களாலான தங்க நகைகளை அணியலாமா?’ எனும் தலைப்பில் நான் கீழ்வரும் ஆக்கத்தினை பல்வேறு வினாக்களைத் தொடுத்து காத்தான்குடி தாறுல் அதர் அத்தஅவிய்யாவின் மின் அஞ்சல் முகவரிக்கு சுமார் மூன்று முறை அனுப்பியிருந்தேன். எனினும் இதுவரை அவர்களிடமிருந்து எந்தவொரு பதில்களும் எனக்கு அனுப்பி வைக்கப்படவில்லை. ஆதலால் இதனை தங்களின் ‘வாரஉரைகல்’ பத்திரிகைக்கு அனுப்பி வைக்கின்றேன். ‘வார உரைகல்’ அடுத்த பிரதியில் இதனைப் பிரசுரித்தேனும் எனக்கு தக்க பதில்களை பெற்றுத் தாருங்கள். இதோ கடிதம் வருமாறு:-

‘நான் இதுவரை காலமும் கேள்வியுறாத மேற்படி தலைப்பில் தாங்கள் அண்மைக் காலமாக பிரசாரங்களை முன்னெடுத்து வருகின்றீர்கள். இது ஒரு புதிய விடயமாக இருந்தாலும் உங்களின் அமைப்பினால் பல வருட காலமாக ஆய்வு செய்யப்பட்டு தெளிவான விடை காணப்பட்டதாக தங்களின் துண்டுப் பிரசுரத்தில் குறிப்பிட்டிருந்தீர்கள். எனினும் தங்களின் தாருல் அதர் அமைப்பினை சில வருடமாகவே நான் அறிவேன். தங்களின் கருத்துக்களில் எந்தளவு நம்பகத் தன்மை காணப்படலாம் என்பதில் ‘இந்த பல ஆண்டுகளாக ஆராய்ச்சி செய்து வருகின்றீர்கள்’ என்ற கருத்து சற்று தளர்வைத் தோற்றுவிக்கின்றது.

இருந்தாலும் யாருக்கும் அஞ்சாமல் முற்போக்குடன் குர்ஆன், ஹதீஸ் அடிப்படையில் உங்கள் கருத்துக்களைக் கச்சிதமாகக் காவுவதானது காத்தான்குடியைப் பொறுத்தமட்டில் வரவேற்கத்தக்கதே! எனக்கு பெண்கள் தங்க வளையல்களால் உருவாக்கப்பட்ட நகைகளை அணியலாமா? என்னும் விடயத்தில் பின்வரும் சந்தேகங்கள் காணப்படுகின்றன. இவற்றுக்கு என் மனம் திருப்தி காணும் வகையில் விடை பகர்ந்தால் தூய இஸ்லாம் தொடர்பில் உங்களின் கருத்துக்களை ஏற்று தற்போது நான் இருக்கும் நிலையிலிருந்து மீட்சி பெற முடியும்.

தாங்கள் இணையத்தில் பதித்திருக்கின்ற ஒலிப்பதிவுகள் தெளிவாக விளங்கவில்லை. ஆதலால் எனது பின்வரும் சந்தேகங்களுக்கு எழுத்து மூலம் விடைபகர்ந்தால் உதவியாக இருக்கும். சந்தேகங்கள்:

01.தங்கத்தினாலான வளையல்கள் சார்ந்த நகைளைத் தவிர வேறு ரகத்தில் (வடிவங்களில்) தங்கத்தில் நகைசெய்து அணியலாமா?

02.தங்கத்தில் நகை அணிவதனை விடுத்து ஏனைய உலோகங்களில் நகை செய்து அணியலாமா? உதாரணமாக செம்பு, வெள்ளி, பிளாற்றினம், பித்தலை, வெள்ளைத் தகடு, வெள்ளிரும்பு போன்ற இன்னும்பிற

03.பெண்கள் தங்க வளையல் நகைகள் அணியக் கூடாது என்றால் ஆண், பெண் இல்லாதவர்கள் அவற்றை அணியலாமா?

04.தங்க நகை அணிவது ஹறாம் என்றால் நகை வியாபாரம் செய்யலாமா? அது ஹறாமாகுமா? நமது இஸ்லாமியர்களுக்கு விற்பனை செய்வது தடைசெய்யப்பட்டது எனும் விவாதத்திற்கு வந்து ஏனைய மதத்தினருக்கு அல்லது கொள்கை உடையவர்களுக்கு அவற்றை விற்கலாம் என்றால் அவர்களுடன் எத்தகைய வியாபாரமும் மேற்கொள்ளலாமா? உதாரணமாக சாராயம், போதைவஸ்து, ஆபாசப் பொருட்கள் விற்பனை.

05.இவ்வளவு காலமும் தங்க நகைக் கடை வைத்து இஸ்லாமியர்களிடையே தொழில் புரிந்து இந்த விடயத்தில் உண்மையான தெளிவு கண்ட பின்னர் அவ்வாறு இவ்வளவு காலமும் அதனால் உழைத்த பணம், பொருட்களை என்ன செய்யலாம்? அவை ஹறாமாகுமா?

06.ஒருவர் நமது பிரதேசத்திலுள்ள வளையல்களினாலான தங்க நகை வியாபாரம் செய்யும் கடையில் தொழில் புரியலாமா? உடனே விலகிக் கொள்ள வேண்டுமா?

07.தற்கால நகைக்கடைகளில் தனித் தங்கத்திலான அணிகலன்களைக் காண்பது அரிதாகும். தங்கத்துடன் பிறிதொரு சேர்மானம் சேர்த்தே நகைகள் செய்யப்படுகின்றன. தனியே தங்கத்தில் நகை செய்யும்போது அவை இலகுவில் நெகிழ்ந்து கொடுக்கும் தன்மையைப் பெறாது. ஆதலால் தங்கம், ஏனைய உலோகங்கள் (உதாரணமாக செம்பு, வெள்ளி, பிளாற்றினம், பித்தளை, வெள்ளைத் தகடு, வெள்ளிரும்பு முதலான) இணைந்த கலவைகளைக் கொண்டே நகைகள் வடிவமைக்கப்படுகின்றன. ஆகவே தங்கத்துடன் மிக்ஷர் செய்யப்பட்ட கலவை நகைகளைத்தான் இன்றைய நடைமுறையில் நம் பிரதேசங்களில் அதிகமானோர் அணிகின்றனர். மிக்ஷர் செய்யப்பட்ட இவற்றை அணியக் கூடாது என்று ஹதீஸ் ஆதாரம் உள்ளனவா? அல்லது தனியே தங்கத்தினால் செய்யப்பட்டதுதான் என்றுள்ளதா?

08.இந்த விடயத்தில் காது குத்துவது ஹறாம் என்றால் ஏற்கனவே குத்தப்பட்ட எமது தாய், பிள்ளைகள், மனைவிமார்களின் காதுகளில் காணப்படும் ஓட்டைகளுக்கு மார்க்கத்தீர்ப்பு என்னவாகும்? காது குத்தப்பட்ட அவர்களுடன் வாழலாமா?

09.இவ்வாறான கொள்கைகளை ஏற்கனவே அல்பானிய இமாம்கள் பரப்பிச் சென்று விட்டனர். அவர்களது மறுவடிவமே நீங்கள் என்று காத்தான்குடியிலுள்ள சில அமைப்புக்கள் கூறுகின்றனவே!? அல்பானிகளின் ஏஜென்டுகளாக தாறுல் அதரைக் கொள்ளலாமா?’ நன்றி! 

RM.Rijaque Ahamed,  Email ID: rijaqueahamed@yahoo.com 02.07.2009

நபி (ஸல்) அவர்கள் ஆரம்ப காலத்திலிருந்தே எல்லா மக்களிடமும் காணப்பட்ட நற்பண்புகள் அனைத்தையும் தனக்குள் ஒருங்கே அமையப் பெற்றிருந்தார்கள். நேரிய சிந்தனை, ஆழ்ந்த பார்வை, நுண்ணறிவு அனைத்தையும் தன்னகத்தே கொண்டிருந்தார்கள். நீண்ட மௌனத்தால் ஆழ்ந்து சிந்தித்து உண்மையை அறிவார்கள். தங்களது முதிர்ச்சியான அறிவாலும் தூய இயற்கைக் குணத்தாலும் மனித வாழ்வின் பகுதிகளையும், மக்களின் செயல்களையும், சமூகத்தின் நிலைகளையும் மிகத் தெளிவாக ஆராய்ந்து மக்களிடம் காணப்பட்ட மூடப் பழக்க வழக்கங்களை வெறுத்து ஒதுக்கினார்கள். மக்களுடன் மதி நுட்பத்துடன் பழகுவார்கள். அவர்கள் நன்மையானவற்றில் ஈடுபடும்போது தானும் கலந்து கொள்வார்கள். தீமையானவற்றில் ஈடுபட்டால் அவர்களை விட்டும் தனித்து விடுவார்கள்.

நபி (ஸல்) அவர்கள் மது அருந்தியதில்லை. சிலைகளுக்குப் பலியிட்டதை உண்டதில்லை. சிலைகளுக்கான விழாக்களில் கலந்து கொண்டதில்லை. சிலைகளை முற்றிலுமாக வெறுத்தார்கள். லாத், உஜ்ஜா போன்ற சிலைகளைக் கொண்டு சத்தியம் செய்வதைச் சகித்துக் கொள்ள மாட்டார்கள்.

இறைவனின் பாதுகாப்பு அவர்களைச் சூழ்ந்து இருந்தது. உலக இன்பங்களின் மீது ஆசை தோன்றும்போதும், தவறான அறியாமைக் காலப் பழக்க வழக்கங்களில் ஆவல் ஏற்படும்போதும் அவற்றிலிருந்து அழ்ழாஹ்வின் அருளால் தடுக்கப்பட்டார்கள். நபி (ஸல்) அவர்கள் கூறினார்கள்: ‘அறியாமைக்காலச் செயலை செய்ய வேண்டுமென நான் இருமுறை மட்டுமே விரும்பினேன். அந்த இரு முறையும் அழ்ழாஹ் என்னைத் தடுத்து விட்டான். பிறகு அழ்ழாஹ் தூதுத்துவத்தை எனக்கு அருளும்வரை அந்த எண்ணம் ஏற்பட்டதே இல்லை.’

‘ஓர் இரவு மக்காவின் மேற்பகுதியில் ஆடு மேய்த்துக் கொண்டிருந்த ஒரு சிறுவரிடம் என் ஆடுகளை நீ பார்த்துக் கொள். மக்காவில் வாலிபர்கள் இராக்கதை பேசுவதுபோல் நானும் பேசி வருகின்றேன் என்று நான் கூறினேன். அவர் ஒப்புக் கொண்டார். நான் வெளியேறி மக்காவினுள் நுழைந்து அதில் முதல் வீட்டைக் கடந்தேன். அங்கிருந்து வந்த இசைச் சப்தத்தைக் கேட்டு அது என்னவென்று விசாரித்தேன். அதற்கு மக்கள் இன்ன ஆணுக்கும் பெண்ணுக்கும் திருமணம் முடிந்து இன்று முதலிரவு என்று கூறினர்;. நான் அதைக் கேட்கவென்று அமர்ந்தவுடன் என்னால் செவியேற்க முடியாத வகையில் அழ்ழாஹ் என்னைத் தடுத்துத் தூங்கச் செய்து விட்டான். இறுதியில் சூரிய வெப்பம்தான் என்னை எழுப்பியது. எனது தோழரிடம் நான் சென்றபோது அவர் என்ன நடந்ததென விசாரிக்க நான் நடந்ததைக் கூறினேன். அதற்குப் பிறகு நான் எந்தவொரு தீய செயலையும் செய்ய எண்ணியதில்லை.’

ஜாபிர் இப்னு அப்துழ்ழாஹ் (ரழி) அவர்கள் அறிவிப்பதாவது: ‘கஅபாவைப் புதுப்பிக்கும் பணியின்போது நபியவர்களும், அப்பாஸும் கற்களை எடுத்துக் கொடுக்கும் பணியைச் செய்தார்கள். அப்போது அப்பாஸ், நபி (ஸல்) அவர்களிடம் ‘உங்களது கீழாடையைக் கழற்றி புஜத்தில் வைத்துக் கொண்டால் கற்கள் அழுத்தாமலிருக்கும்’ என்று கூறினார். நபி (ஸல்) அவர்கள் தன் ஆடையைக் கழற்றி புஜத்தில் வைத்ததும் கண்கள் மேலே சொருக மயக்கமடைந்து விட்டார்கள். பிறகு அவர்கள் தெளிவடைந்து ‘என் கீழாடை என் கீழாடை..!’ என்று கூறவே நபியவர்களுக்கு அப்பாஸ் அந்த ஆடையை உடுத்தி விட்டார்கள். அதற்குப்பின் அவர்களின் மறைவிடத்தை எவரும் பார்த்ததில்லை.’

நபி (ஸல்) அவர்கள் தங்களது கூட்டத்தாரிலேயே மிகவும் இனிய குணம், உயர் பண்பு, சிறந்த ஒழுக்கம், மனிதாபிமானம் உடையவர்களாகவும், மென்மையானவராகவும், நன்மை செய்யக்கூடியவராகவும், அமானிதம் பேணி வாக்குறுதியை முழுமையாக நிறைவேற்று பவராகவும் இருந்தார்கள். இந்த உயர் பண்பு களைக் கண்ட அவரது சமூகத்தார்கள் அவர்களை ‘அல் அமீன்’ நம்பிக்கையாளர் என்று அழைத்தனர்.

அவர்கள் பிறர் சிரமங்களைத் தானே தாங்கிக் கொள்வார்கள். இல்லாதோருக்கும், எளியோருக்கும் கொடுப்பார்கள். விருந்தினர்களை உபசரிப்பார்கள். சிரமத்தில் தவிப்பவர்களுக்கு உதவுவார்கள். இவ்வாறுதான் அன்னை கதீஜா (ரழி), நபி (ஸல்) அவர்களைப் பற்றி வர்ணிக்கிறார்கள். (பெருவாழ்வு தொடரும்)
.

புதிய காத்தான்குடிக்கு என்று தனியான தபாலகக் கட்டிடமொன்று பல லட்சம் ரூபா செலவில் கட்டி முடிக்கப்பட்டுள்ள போதிலும் பல வருடகாலமாக அக்கட்டிடம் திறக்கப்படாமலேயே இருந்து வருகின்றது.

இதேவேளையில் காத்தான்குடி ப.நோ.கூ. சங்கத்திற்குச் சொந்தமான வாடகைக் கடையொன்றில் இயங்கிவரும் புதிய காத்தான்குடி தபாலகம் பல்வேறு அசௌகரியங்களைக் கொண்டதாகக் காணப்படுகின்றது.

சுமார் பத்து வருடங்களுக்கு முன்னர் புதிய காத்தான்குடி தபாலகம் 2ம் தரத்திலான தபாலகமாகத் தரம் உயர்த்தப்பட்ட போதிலும் எந்த வகையிலும் அதன் தரம் உயர்ந்து காணப்படவில்லை.

தபால் விநியோக சேவை ஒன்றைத் தவிர பிரதான தபாற் கந்தோர் ஒன்றில் மேற்கொள்ளப்படும் அனைத்து சேவைகளும் இத்தபால் நிலையத்தில் வழங்கப்படுகின்றன. வெளிநாடுகளில் இருந்து துரிதமாகப் பணம் அனுப்பு கின்ற ‘ஈஸ்ட்டர்ண் மணி ட்ரான்ஸ்பர்’ சேவையும் இங்கு நடைமுறைப்படுத்தப்படுவதாக விளம்பரப்பலகை நிறுவப்பட்டுள்ளது.

இத்தபால் நிலையத்திற்கு வழங்கப்பட்டுள்ள பெறுமதிமிக்க கணனி இயந்திரங்கள், பெக்ஸ் இயந்திரம் போன்றவையும் மக்களின் பாவனைக்கு விட இடவசதியற்ற நிலை காரணமாக காட்சிக்கு மாத்திரம் அவை இத்தபாலகத்தில் வைக்கப்பட்டுள்ளது.

சுமார் 10 அல்லது 15 ஆண்டுகளுக்கான கணக்காய்வு செய்யப்பட வேண்டிய ஆவணங்களும் பண்டல் பண்டல்களாக இங்கு கட்டப்பட்டு குவிக்கப்பட்டுள்ளன.

இங்கு கடமையாற்றும் தபாலகப் பணியாளர்களுக்கு எவ்வித வசதிகளும் இல்லை. குடி நீருக்கும், இயற்கைக் கழிப்புகளுக்கும் தபாலகத்தை விட்டு எங்கேயாவது சென்று தொலைக்க வேண்டிய அவலத்தில் அவர்கள் காணப்படுகின்றனர். சிறு தலையிடி ஏற்பட்டாலும்கூட சற்று ஓய்வெடுத்துச் செயற்பட அவர்களுக்கு ஓய்வறை வசதியும் இல்லை. அவர்கள் நிற்பதற்கும், அமர்வதற்கும் மாத்திரமே தற்போதைய வாடகைத் தபாலகத்தில் இடம் காணப்படுகின்றது.

பல லட்சம் ரூபாய் செலவில் கடற்கரை வீதியில் நிர்மாணிக்கப்பட்டுள்ள புதிய தபாலகக் கட்டிடத்தில் ஆட்டோ வாகனங்கள் பாதுகாப்பாக நிறத்தி வைக்கப்பட்டுள்ளன. சுற்றிவர புதர்களும், மரங்களும் வளர்ந்து காணப்படுகின்றன. இத்தனை விசாலமான கட்டிடமொன்றைக் கட்டி வைத்துக்கொண்டு ஏன்தான் இவ்வாறான ‘கோழிக்கூடு’ போன்ற வாடகைக் கட்டிடத்தில் இத்தபாலகத்தை இயங்கச் செய்ய வேண்டும்? என மக்கள் கேள்வி எழுப்புகின்றனர்.

ஸ்ரீ.ல.மு.காங்கிரஸ் தலைவர் அல்ஹாஜ் றவூப் ஹக்கீம் அவர்கள் அரசாங்கத்தடன் இணைந்து தபால் அமைச்சராகப் பதவிப் பிரமாணம் செய்தவுடன், “அமைச்சர் றவூப் ஹக்கீம் ஆவன செய்வாரா?’ என்று ‘வார உரைகல்’ 16.02.2007ல் தனது 37வது பதிவில் முன்பக்கத்திலேயே தலைப்புச் செய்தி வெளியிட்டது வாசகர்கள் அறிந்ததே!

எனினும் அவர் அதனைக் கண்டு கொள்ளாமலும், திறந்து வைக்காமலுமே அரசாங்கத்தை விட்டு வெளியேறி தனது சமூகத்திற்காகப் போராடச் சென்ற விட்டார். மக்கள் அதிகாரத்தைக் கொடுத்தாலும் இவர்கள் மக்களின் தேவைகளைப் பூர்த்தி செய்பவர்களாக இல்லை.

இப்போதாவது அரசாங்கத்துடன் இணைந்து மாகாண மட்டத்தில் அதிகாரத்தில் இருப்பவர்கள் இந்தத் தபாலகத்தைத் திறந்து வைத்து மக்களினதும், தபாலகப் பணியாளர்களினதும் வசதிகளை அதிகரிப்பார்களா? அல்லது அவர்களும் அப்படியே கண்டு கொள்ளாமல் காலத்தைக் கடத்துவார்களா? எத்தனையோ கட்டிடங்களை முண்டியடித்துக்கொண்டு திறந்து வைப்பதில் அவசரம் காட்டும் அரசியல்வாதிகள் ஏன்தான் இந்தப் புதிய காத்தான்குடிக்கான தபாலகத்தை கண்குறையக் காணுகின்றார்களோ.. அது அந்த ஆண்டவனுக்கத்தான் வெளிச்சம்!

‘நாட்டுப்பற்றுடையவர்களாக நாம் ஒவ்வொருவரும் வாழ்வோமானால் நமக்கான உரிமைகளும், சமூக மதிப்பும் தானாகவே அரசிடமிருந்து கிடைக்கும்’ என லண்டனுக்கான இலங்கையின் புதிய துணைத் தூதுவராக நியமனம் பெற்றுள்ள அல்ஹாஜ் பி.எம்.எம். அம்ஸா தெரிவித்தார்.

கடந்த மூன்றாண்டுகளாக சென்னையிலிருந்து இலங்கை துணைத் தூதுவராகப் பணியாற்றிய அல்ஹாஜ் அம்ஸா, ஜனாதிபதி மஹிந்த ராஜபக்ஷ அவர்களின் தலைமையில் இலங்கை அரசாங்கம் பாசிசப் புலிப் பயங்கரவாதத்;தை முறியடிக்க நடாத்திய இறுதிப் போர்க்காலத்தின்போது தமிழகத்திலும், சர்வதேச நாடுகள் பலவற்றிலும் இருந்து ஆர்ப்பரித்து எழுப்பப்பட்ட இலங்கை அரசுக்கு எதிரான பிரசார முயற்சிகளையெல்லாம் தனது ராஜதந்திர முயற்சிகள் மூலம் மழுங்கடிக்கச் செய்து ஆற்றிய தேசாபிமான சேவையை கௌரவித்து எதிர்வரும் ஆகஸ்ட் முதல் ஐக்கிய இராச்சித்திற்கான துணைத் தூதுவராக ஜனாதிபதி அவரை நிமித்துள்ளார்.

காத்தான்குடியைப் பிறப்பிடமாகக் கொண்ட தூதுவர் அம்ஸா அவர்களின் இந்நியமனத்தை முன்னிட்டு நல்லாட்சிக்கான மக்கள் இயக்கம் கடந்த 04ம் திகதி சனிக்கிழமை மாலை பாராட்டு நிகழ்வொன்றை தம் இயக்க மட்டத்தில் ஏற்பாடு செய்திருந்தது. அதன்போது கலந்துகொண்டு கருத்துரைக்கையிலேயே மேற்கண்டவாறு தெரிவித்த அவர் அங்கு மேலும் கூறியதாவது:

‘முஸ்லிம்கள் எனும் சமூகப்பற்றுடன் இலங்கையர்கள் என்கிற தேசப்பற்றும் எங்களிடம் மிகக்க வேண்டும். நாட்டுப்பற்றுமிக்கதாக நமது செயற்பாடுகள் அமைய வேண்டும். சமூகப்பற்று, பிரதேசப்பற்று என்பவற்றை விட இது நமது தேசம் என்கிற உணர்வுடன் எமது செயற்பாடுகள் அமையும்போது நாம் எதிர்பார்க்கும் சமூக உயர்வும், ஏனைய உரிமைகளும் தானாகவே நமக்கக் கிடைக்கும்.’

‘நான் உலகின் எந்த மூலையில் இருந்தாலும் பிறந்த இம்மண்ணை வெகுவாகவே நேசிக்கின்றேன். என்றாலும் இப்பிரதேசத்துக்கு இதுவரை பெரிதாக நான் எதனையும் செய்யாவிட்டாலும், எனது நாட்டிற்கு விசுவாசத்துடன் நிறையவே பங்களிப்புக்களை வழங்கியுள்ளேன். எதிர்காலத்தில் இன்னும் அதிகமாக செயற்பட்டு இந்த நாட்டை வளமுள்ள ஒரு நாடாக மிளிரச்செய்ய என்னாலான பங்களிப்புக்களைச் செய்வேன்.’ என்றார்.

நல்லாட்சிக்கான மக்கள் இயக்கத்தின் செயலாளர் அஷ்ஷெய்க் ஏ.எல்.எம். சபீல் நளீமியின் தலைமையில் நிகழ்வு இடம்பெற்றது. அதன் சூறா உறுப்பினர் பொறியியலாளர் எம்.எம். அப்துர்ரஹ்மான், காத்தான்குடி ம.ம.வி. தேசிய பாடசாலையின் அதிபர் ஜனாப்.எம்.எம். றபீக் ஆகியோரும் அங்கு உரையாற்றினர்.

மேற்படி பாடசாலையின் பழைய மாணவரான தூதுவர் அம்ஸா, இப்பாடசாலையின் பழைய மாணவர் சங்கத்தின் வளர்ச்சிக்காக 25,000 ரூபாவை நிதியுதவியாக அளித்ததிருப்பதாகவும் பழைய மாணவர் சங்கத்தின் செயலாளர் தெரிவித்தார்.

‘வார உரைகல்’ பத்திரிகையினதும்,  இவ்விணையதள செய்திச் சேவையினதும் வளர்ச்சியை வரும்பும் வாசக அன்பர்கள் தமது நிதியுதவிகளை ‘M.I. Rahmathullah, S/Ac. No: 8003932, Bank of Ceylon, Kattankudy Branch (Sri Lanka) ‘ எனும் வங்கிக் கணக்கினூடாக அனுப்பி உதவலாம்.