பள்ளிவாயலின் புனிதம் கெடுத்த இரண்டாவது இப்தார்! -ஜமாஅத்தார் கண்டனம்-

மட்டக்களப்பு ஜாமிஉஸ்ஸலாம் நகர ஜூம்ஆப் பள்ளிவாசலில் கடந்த 02ம் திகதியன்று நடைபெற்ற ‘இஃப்தார்’ நோன்பு துறக்கும் நிகழ்ச்சி குறித்து அப்பள்ளிவாசல் ஜமாஅத்தார் தமது ஆட்சேபனையை ‘வார உரைகல்’ லுக்குத் தெரிவித்துள்ளார்கள்.

இதுதொடர்பாக அவர்களின் ஆட்சேபனையில் தெரிவித்திருப்பதாவது:

மட்டக்களப்பு ஜாமியுஸ்ஸலாம் நகர ஜூம்ஆப்பள்ளி கிழக்கு மாகாணத்தில் மிகவும் புகழ்பூத்ததொரு பள்ளிவாயலாகும். இந்திய வம்சாவளி ஆலீம்களால் முதன்முதலாக தராவீஹ் தொழுகையின்போது அல்குர்ஆனின் 30 பாகங்களையும் ஓதி தமாம் செய்யப்பட்டதன் காரணமாக இதன் புகழ் கிழக்கு மாகாணமெங்கும் பரவியது.

காத்தான்குடியிலிருந்தும் கண்ணியமிக்க ஓடக்கரை ஆலிம், அபதுல் கபூர் ஹாஜியார் ஆலீம் போன்ற பல பெரியார்கள் இப்பள்ளியில் தராவீஹ், தஸ்பீஹ் தொழுவதற்காக தோணிகளைப் பிணைத்து வாவியைக் கடந்து வந்ததாகவும், இவ்வாறே மூதூர் கிண்ணியா போன்ற தூரப் பிரதேசங்களில் இருந்தும் பல ஆலீம்கள் றமழான் மாதங்களில் இப்பள்ளிவாயலுக்கு வந்த சிறப்பித்தாகவும் சங்கைக்குரிய ஷைகுல் பலாஹ் அவர்களின் உபதேசங்களில் இருந்து எம்மால் அறிய முடிகின்றது.

இவ்வாறான கண்ணியத்திற்குரிய இப்பள்ளிவாசலில் இந்திய ஆலிம்களின் நிர்வாக காலத்திற்குப் பின்னர் காத்தான்குடியைச் சேர்ந்த வர்த்தகர்களான டிப் டொப் நூகுலெப்பை ஹாஜியார், எம்.சீ.எம். இஸ்மாயில் ஹாஜியார், எம்.எம்.ஈ. இப்றாஹீம் ஹாஜியார், முதலியார் சின்னலெப்பை, அவரது மகன் பாரூக் சின்னலெப்பை, நியூமர்ழியாஸ் அமீன் ஹாஜியார், சாபி சன்ஸ் ஜிப்ரி ஹாஜியார் போன்ற பலரும் மிக சீரான, நேர்த்தியான, கண்ணியமான நம்பிக்கையாளர்களாக இருந்து அல்லாஹ்வின் அமானிதத்தையும், அதன் புனிதத்தையும் பாதுகாத்தனர்.

ஆனால்,  இன்றைய நம்பிக்கையாளர்களோ பொலீஸ் உயர் அதிகாரி, இராணுவ உயர் அதிகாரி, மாநகர உயர் அதிகாரி, விலைக்கட்டுப்பாட்டு அதிகாரி போன்ற அரச உயர் அதிகாரிகளுக்கு மிக நம்பிக்கையாளர்களாகச் செயற்படுவதாகவே ஜமாஅத்தார்களான நாங்கள் கருதுகின்றோம்.

இந்த அதிகாரிகளின் நம்பிக்கைக்குப் பாத்திரமாக இவர்கள் போட்டுள்ள ஒரு வேஷமாகவே இவர்களின் நம்பிக்கையாளர் பதவிகளையும் இப்போது நாம் பார்க்கின்றோம்.

சென்ற வருடமும் இப்பள்ளிவாயலில் நடைபெற்ற இப்தார் நிகழ்ச்சிக்காக ‘பாலூதா சிறப்பு இப்தார்’ என அழைப்பிதழ்கள் அச்சிட்டுக் கொடுக்கப்பட்டன. நம்பிக்கையாளர் சபையைக் கலந்தாலோசிக்காமல், பிரதம நம்பிக்கையாளர் என்ற கர்வத்தில் தனி மனித விருப்பத்தில் மாநகர முதல்வர், உயர் அதிகாரி களுக்கு இவ்வாறு அழைப்பிதழ் கொடுக்கப்பட்டது.

நோன்பாளர்கள் அல்லாத அதிகமானவர்கள் இந்த ‘பாலூதா சிறப்பு இஃப்தார்’ நிகழ்ச்சியில் கலந்து கொண்டனர். இப்படியான அழைப்பிதழுக்கு நிர்வாக உறுப்பினர் இக்பால் ஹாஜியார் போன்ற பலரும் அப்போது எதிர்ப்புத் தெரிவித்திருந்தும் ஜமாஅத்தார்களுக்கும்கூட விருப்பமில்லாத ‘பாலூதா விருந்து’ கொடுத்ததன் மூலம் மாநகர முதல்வருக்கு இப்பள்ளிவாயல் பிரதம நம்பிக்கையாளர் செல்லப்பிள்ளை ஆனார் என்பது பலருக்கும் தெரிந்ததே!

நம்பிக்கையாள்களுக்கு மட்டுமல்ல, ஜமாஅத்தார்களுக்கும் அறவே விருப்பமில்லாத இவ்வாறான பார்ட்டியைக் கொடுத்து எம் பள்ளிவாசலின் புனிதத் தன்மையைக் கெடுத்ததன் மூலம் தனது தொழில் விருத்திக்காகவும், தனது செல்வாக்கு ஸ்திரத்திற்காகவும் உயர் அதிகாரிகளைச் சம்பாதித்துக் கொண்டவர் பிரதம நம்பிக்கையாளர் மாத்திரமே!

இந்தப் பார்ட்டி விவகாரத்தால் நம்பிக்கையாளர்களுக்கு மத்தியிலும் முறுகலும், முனங்கலும் தொடர்ந்தது.

இவ்வருடமும் தன்னிச்சையாகச் செயற்படும் பிரதம நம்பிக்கையாளர் முஸ்லிம் வர்த்தகர் சங்கத்தையும் துணைக்குச் சேர்த்துக் கொண்டு அல்லாஹ்வின் இல்லத்தில் இஃப்தார் விருந்தை மிகச் சிறப்பாக நடாத்தியிருக்கின்றார்.

இப்பள்ளிவாசலின் கண்ணியம் காக்கப்பட்டதற்கு ஒரு உதாரணத்தை இங்கு நாம் சொல்லிக்கொள்ள விரும்புகின்றோம்.

1990ம் ஆண்டு காத்தான்குடிப் பள்ளிவாசல் படுகொலை, ஏறாவூர் சதாம் ஹூஸைன் கிராமப் படுகொலை போன்ற வன்முறைப் படு கொலைக் காலத்தில் அல்லாஹ்வின் பாதுகாப்புடன் புளியந்தீவு நகருக்குள் வாழ்ந்தவர்கள் இப்பள்ளிவாசலின் ஜமாஅத்தார்களான ஊர்வாசிகளே!

சிலர் புளியந்தீவுக்குள் இருந்தால் நம்மையும் தீர்த்துக் கட்டிவிடுவார்கள் என்ற அச்சத்தில் வெளியூர்களுக்கு குடும்பத்துடன் சென்றார்கள்.

இருப்பினும் இக்பால், சாலி மாஸ்டர் போன்ற நம்பிக்கையாளர்களும் சுமார் 15 குடும்ப அங்கத்தவர்களும் பாதுகாப்பு நிமித்தம் இரவு வேளைகளில் இப்பள்ளிவாயலில் தங்கியிருந்தனர்.

அப்போதும் அவர்கள் உட்பள்ளியை மூடிவிட்டு வெளி விறாந்தாவிலும், மேல் மாடியிலும்தான் தங்கியிருந்தனர். தொழுகைக்கான பிரதான தளமாகக் கருதப்படும் உட்பள்ளி அந்த இக்கட்டான காலகட்டத்திலும் கண்ணியமாகப் பாதுகாக்கப்பட்டது. யாருமே உட்செல்ல முடியாதவாறு அது முற்றாக மூடப்பட்டிருந்தது.

ஆனால் இன்றைய நிர்வாகத் தலைவர் தனது வியாபாரத் தொலை நோக்க இலாபம் கருதி அரச உயர் அதிகாரிகளுக்கு, ஆண் – பெண் – அந்நிய மக்கள் எனப் பாராது, ஜூம்ஆப் பள்ளி என்ற கௌரவத்தைக் கொடுக்காது ஏதோ திருமண மண்டபம் – விருந்து மண்டபம் போன்று உட்பள்ளிவாயலுக்குள் ‘இஃப்தார்’ என்ற பெயரில் வருடத்திற்கொரு முறை பாலூதா விருந்து, சிற்றுண்டி விருந்தளித்து தனது செல்வாக்கையும், வியாபாரத்தையும் வளர்க்கும் போக்கைத் தொடர்ந்து வருகின்றார்.

இதனை இப்பள்ளிவாசலின் ஜமாஅத்தார்களான நாம் வன்மையாகக் கண்டிக்கின்றோம். இந்த வருடத்தோடு இந்தப் பள்ளிவாயலினுள் ‘பாலூதா விருந்து’ கொடுக்கும் பழக்கத்தை நிறுத்திக் கொள்ள வேண்டுமென கேட்டுக் கொள்கின்றோம்.

பல் சமூக, பல் சமய ஒற்றுமையை புனிதமான இறை வழிபாட்டுத் தலங்களில் எந்த சமயத்தவரும் சமூகத்தினரும் ஏற்பாடு செய்வதில்லை என்பதையும் நாம் அவருக்குச் சுட்டிக்காட்ட விரும்புகின்றோம்.

கிறிஸ்த வர்கள் அவர்களின் தேவாலயத்திலோ, இந்துக்கள் அவர்களின் கோயில்களிலோ, பௌத்தர்கள் அவர்களின் விகாரைகளிலோ இத்தகைய பல் சமய பல் சமூக இன ஐக்கிய உறவுப்பால நிகழ்ச்சிகளை நடாத்துவதில்லை.

அவர்கள் அவர்களின் வழிபாட்டுத் தலங்களில் அவர்களின் சமய வணக்க வழிபாடுகளை மாத்திரமே மேற்கொண்டு வருகின்றனர். இந்த ஒழுங்கிலிருந்து எமது பிரதம நம்பிக்கையாளர் மாத்திரம் முறை தவறுவது ஏனோ…?!

எமது பிரதம நம்பிக்கையாளரும், முஸ்லிம் வர்த்தகர் சங்கமும் சேர்ந்து புளியந்தீவு, சோனகர் வீதி, ஆமன் கோணர் வீதி, கோட்டைமுனையில் வசிக்கும் முஸ்லீம்களுக்கு, நோன்பாளிகளுக்கு இஃப்தார் நிகழ்ச்சியை ஏற்பாடு செய்திருந்தால் ‘அல்ஹம்துலில்லாஹ்’ என்று அம்மக்கள் துஆச் செய்து  இருப்பார்கள். இந்த இஃப்தாரில் கலந்து கொண்டவர்களில் எத்தனை பேர் இவ்வாறு ‘அல்ஹம்துலில்லாஹ்’ எனக் கூறியிருப்பார்கள்?

100 வீதம் முஸ்லீம்கள் வாழ்கின்ற காத்தான்குடியில் அந்நிய மத ஆண் பெண்களும் கலந்துகொள்ளும் வகையில் ஜும்ஆப்பள்ளிவாயலொன்றில் இவ்வாறான ‘இஃப்தார்’ நிகழ்ச்சியொன்றை நடாத்த இயலுமா..?

எனவே, நம்பிக்கையாளர்களே..! உயர் அதிகாரிகளுக்கு நீங்கள் ‘இப்தார்’ ஏற்பாடு செய்ய வேண்டுமாக இருந்தால் அதை உங்களது இல்லங்களில் அல்லது வாடகை மண்டபங்களில் சிறப்பாகச் செய்யுங்கள். அதனை நாம் தடுக்கவில்லை. அதுவே உங்களுக்கும் சிறப்பு.

அல்லாஹ்வின் இல்லத்தை உங்களின் செல்வாக்குப் பிரசித்தம், வியாபார நோக்கு, எதிர்கால சுயகௌரவ நன்மைகளைக் கருத்திற் கொண்டு இவ்வாறான வேலைகளுக்குப் பயன்படுத்த இனியும் துணியாதீர்கள்! உங்கள் சிறப்பைக் காட்டுவதற்காக அல்லாஹ்வின் இல்லத்தின் தனித்துவத்திற்கும், புனிதத்துவத்திற்கும் மாசு கற்பிக்காதீர்கள்!! இந்த வருட நிகழ்வே இவ்வாறான சுயநல செயற்பாடுகளுக்கான கடைசிச் செயற்பாடாக இருக்கட்டும் என நாமும் பிரார்த்திக்கின்றோம்!!!

சென்ற வருட ‘பாலூதா இப்தார்’ நிகழ்வைக் கண்டித்து துண்டுப்பிரசுரம் வெளியிட்டு எமது கண்டனத்தைத் தெரிவித்தோம்.

இவ்வருடம் எமது பிராந்தியப் பத்திரிகையான ‘வார உரைகல்’ மக்கள் ஊடகம் மூலம் உங்களின் இத்தகைய செற்பாடுகளுக்கு எமது வன்மையான கண்டனங்களைத் தெரிவித்துக் கொள்கின்றோம்.

2010

09/14

POSTED BY

புவி எம். ஐ. றஹ்மதுல்லாஹ்

CATEGORY

செய்திகள்

Write comment